الشعر الشعبي

احيان / للشاعر : فارس بن فايح ..

نشر الموضوع :

image

دايم اقول اني رجل اقوى من اني احتريه
لكن من غيابه وانا جالس وادور له عذر !

واحيان انوي لكن الفرصه ماتسنح لي اجيه
واقول ودي بشوفته لكني اضعف من قدر

واحيان اقول ان طوّل : الدنيا ولا توقف عليه
وليا تذكرته كتبت الضيق كله في شطر

واحيان امر الشارع اللي كنت ماسك به يديه
واحاول اكتب عنه لكن ما اقدر اكتب لو سطر

واحيان لامني سجدت اقول : يالله تهديه ..
واحيان اقول ان الاماني كل ابوها في صِقر

واحيان اقول الناس تتشابه وهو ماله شبيه
وماله شبيه الا سحابة صيف تبخل بالمطر

واحيان احس ان الزمن متغير وصاير كريه
واللي تغير مو زمن .. اللي تغير هالبشر ..

واحيان اقول ان الغلط منّي ياليتن محتويه
بس الله اللي ماجعل فيني بهالدنيا صبر

واحيان يقضي ليلنا ما بين لا وبين ايه
ان قلت انا ياقلب وش ضنك يمر او مايمر ؟

واحيان ردّه ” لالا” وان قلت له طيب وليه ؟
يقول لو وده لقى امداه / ذا ثامن شهر

ماهو بشرط اللي يبيك تكون تغليه وتبيه
ولاهو ضروري من تبي يلقى له بقلبك مقر

وحتى لو الغلطه من العاشق تجيه وتبتليه
تر غلطة العاشق بألف وغلطه الشاطر عشر

خلك نبيه ان كان ماودك تصير اللي نبيه
وخلك حذر مايسلم من الناس غير اللي حذر

والشي دامك تجهله خله ولا تحتار فيه
مالك ومال الغوص ياللي خفت من موج البحر

واللي يبيعك لو ذهب ؟ فلا تفكر تشتريه
مهما تضيمه حاجته تر مايبيع الما شجر

ولايبكي بهالوقت كود اثنين عاشق او سفيه
لكن على كل حال وقّف لاتميل وتنكسر ..

والحب لامن مات مثل القلب وشلون تحييه ؟
ياللي تهاب من القبر .. مردك تزور القبر

قلت اصبر اصبر من رحل ماتاقف الدنيا عليه
ومن عوّد لصدري اشتغل عقلي : يمر او مايمر ؟

.

شعر : فارس بن فايح

دعم المشاريع الأدبية المساهمين في دعم المشاريع الأدبية
Subscribe
Notify of
guest
0 تعليقات
Inline Feedbacks
View all comments
زر الذهاب إلى الأعلى
0
Would love your thoughts, please comment.x
()
x