نص مميز وفاخر من شاعر مميز له بصمته الخاصة في قصيدته ..
يحمل نفس الإبداع فيما يكتب من شعر ... أسعد الروابة ونص يهديه لأنهآره
تثاوب الصبح ..ماللدرب مـن تالـي
يا آخر الدرب خلصنـي مـن اولتـه
لازلت احايلْك وآمالـي هـي آمالـي
والجرح شلته وبعـده مثـل ماشلتـه
راح اكثر العمر ضيعته مـن هبالـي
مابيـن حمـلٍ ثقيـل وحلـمٍ اولتـه
واللي يزيد قْهري ويقطَـع اوصالـي
بالقلب نصف الحكي للحيـن ماقلتـه
آحاول ارقى عن الذكـرى وترقالـي
آحاول اقرب مـن النسيـان ماطلتـه
ويسريبي الوجد احس برجفة ظلالـي
مايخجل البرد جمرٍ بالحشـا اشعلتـه
يافاخر الحسن مـن حـدوك عذالـي
هانت عليك الدموع وجرحي اهملتـه
وتركتني في مهب الشـوق ولحالـي
بـلا وداع وعليـك الدمـع سيلـتـه
ارد مني العـزا عنـي ...وتبرالـي
قطعان حزني حنين القلـب واسألتـه
قلبي ...ويبقى العتب وان قال لك غالي
من وين جبته ..وشف ولوين وصلتـه
ياطاير الشوق وش جابك على جالـي
رميت عشك علـى جرحـي وثقلتـه
فتحت باب ٍ يجيب الريح فـي بالـي
وشلون مدري ؟ وانـا يـادوب قفلتـه
شفني بنصف الدرب والآخـر قبالـي
لا قادر ارجع ولالي فـي مواصلتـه
تقول دربـك وعـر وآقـول عزالـي
اشوف يومـك تبـي بيديـك سهلتـه
والا عزيز النفس يالمتـرف السالـي
ماذلته فـرْ قِتًـك لـو كنـت ذللتـه
والنخل ماينحنـي ويمـوت بالعالـي
وش عـاد لـو سْعفـه للقـاع ميلتـه
الشمس نامت وبانت وحشـة التالـي
يا آخر الدرب ..رجعني علـى اولتـه
شعر : أسعد الروابة
