ونسبق خطاوينا نهرول للمكان – إلاّ نطير!
نسرح نسولف .. والسدر يغمز بعين صْنوبره
من أرض الإبداع , والشعر التصويري .. يأتينا الشاعر مطر البريكي بفارعة تزهو
في صفحات مجلة أنهآر الأدبية ويهدينا هذا النص الأنيق جدا ,,,
مريت صدفه بالطريق اللي ذكرني بكل خير
صافح يديني وادْمعت من ضيمها هناك شْجره
الله ياذاك المكان - اتصدّقي؟؟ كل شي بخير
نفس المشاهد كلها - بس القلوب مبعثره !!!
كان ( الخميس) - العيد- أذكر نلتقي حزّة عصير
وكنتي وانا مانلتفت لـ أية عيون وثرثره
والحاره اللي مالها إلاّ ( مطر ) يهوى (عبير)!!
قضّوا بسيرتنا النهار بأوله لي آخره
وانتي همستي : وش علي؟؟ خلّه يغير اللي يغير
النار تاكل بعضها والجمر مات بْمجمره
ونسبق خطاوينا نهرول للمكان – إلاّ نطير!
نسرح نسولف .. والسدر يغمز بعين صْنوبره
وتسولفيلي عن شقاوة (مصطفى) أخوك الصغير
وعن بطش أمك – كيف اهي تبغض هوانا وتحقره
وتسولفي وتسولفي . . تحكي وانا عقلي يطير
إلاّ ابن عمّك آتغصّص لو أحاول أذكره !!!
آقول: اسمي بكرنا ( أحمد ) تقولي: لا ( سمير )
ويطول فينا هالجدال . . انحمدّه ونسمّره
وتصوّري فستان عرسك أبيض مزركش حرير
تتمخطري ليلة زفافك بختره في بختره
نطلق عنان احلامنا للي يصير ومايصير
تحكي لي عن (ليلى) وانا معجب بقصة (عنتره)
وبيديك ورده ( ايحبني م ايحبني ) عدتي كثير
وانا انقش حروف اسمنا يمّك على خد صْخره
أذكر رسمتي لي بكفي "سهم" في قلبٍ شطير
وانا يجول بخاطري . . (ماعاش منهو يشطره)
لين يتساكب ليلنا واقول: بدري ع المسير
ليلٍ نتوه بوحشته لولا جبينك وقْمره
أثر الليالي كلها في عالمي حلمٍ كســـــير
حتى المواعيد الجميله مسخره في مسخره
واثرك هنا في دنيتي . . الموت والحظ الفقير
ومن تنكره الدنيا ترى – كل الحبايب تنكره!
دوري غدى في لعبتك " العاشق الصب الضرير"
وانتي بأدوار البطوله تستحقي المفخره !!
ماكنت اصدقهم وقالوا : تكتشفها بالأخير
المعذره(ست الحسن) توّي دريت المعذره
اتصدقي ؟! كل الجروح اللي ذكرتيها بخير
اطمني كل شي بقى – إلا القلوب مبعثره !!!
شعر : مطـــر البريكــي
