شجاعة حب … / للشاعر محمد بن سفيان – قطر

الكثره الي صيتها واصل الصين
ما حركت شعره براس الشجاعه
 
يا كثرها كلمات حبي من سنين
يا مشجع الفرقا بكلمة وداعه
 
راح الذي قربه يساوي ملايين
ناهيك طيبه والجمال وطباعه
 
ما كان لي وياه في الصدر قلبين
كنا نعيش بقلب واحد جماعه
 
لين الزمن اصدر علينا قوانين
اهل الزمن يابون الا استماعه
 
ماهو كفايه بالادله حديثين
يبغونها بالكيف لو بالاشاعه
 
والي يبي يمشي على ساحل الدين
ماله نصيب بخير بحره وقاعه
 
ركعه نقيه تنقبل يا مصلين
هذا طموحي جعل موتي بطاعه
 
والا حياتي ضايعه بيني وبين
هم الفراق وضيقته وانطباعه
 
غنى الفراق بداخلي عذب صوتين
صوت الحزن غلفه صوت الفجاعه
 
ليه الحسد واهله عدو المحبين
من سبّته نزّل حبيبي شراعه
 
اسهل ترى تفسير ضحك المجانين
من تعرية حاسد بوجه القناعه
 
جوع الوصل كافر يعذب خفوقين
وينه زمنْك الي بيشبع جياعه
 
يا منتظر تدخل بسن الثلاثين
مليون شخص يموت في كل ساعه
 
حدد خيارك في حياتك من الحين
اما شجاعة حب او هي قطاعه
 

شعر : محمد بن سفيان
– قطر