المنوعات الأدبية

الشاعرة [ مرام القحطاني ] مغردة في مجلة أنهآر ..


نشر الموضوع :

image

إعدادسراب الهاجري :

مرام القحطاني ، صوتٌ له من الابداع الكثير ،
نرصد له هنا بعضاً من لمساته الادبية والشعرية
لنشكّل بحرفها هذه الزاوية
التي لا يتحمل جمالها الا بحضور أمثال [ مرام القحطاني ] …
لنقرأها هنا :

واقفة مابين شكي واليقين
مالقيت بزحمة التفكير نور

هِِزّني ياحلمي العذب الثمين
كيف أبسعى لك وانا كلي فتور

~✽~

الصبح يضحك لك إذا الليل بكاك
ربي على كسرة عبيده ، يراعي

لاتلوي ذراعي ولا ابكي لفرقاك
كبرت عن حزني ولوية ذراعي

~✽~

وقت عز إحتياجي لك وانا آسفه
أطول من العمر لو كان عذري قصير

انت لو شفت دمعاتي وهي واقفه
قلت لي : آمري واللي تبينه يصير

~✽~

شحنة لقا ، حرّة تفاصيل ، وغياب
وزفرة ” متى عادك مع الوقت بتجين ؟”

افتح على صدري من الضيق كم باب
واذوب بيد الصبر في روح ” آمين “

~✽~

أحس في صدري بقايا عالم
راحوا وخلوني وحيد مسالم

عشت بتجاربهم وعاشوا عمري
“الواقع أسوء ارض عند الحالِم “

~✽~

ياااه منك لو تصدقني وربك
كل لذة حُب معك آحسّها

ونظرتك اللي بعد ما اقول احبك
هي أجمل من أحبك نفسها !

~✽~

شي عادي تغيب شهور ثمٍ تجي
دمت واثق من اللي دايم تسامحك

بس أنا لا نويت أغيب صعبة أجي
الله يعين قلبي و الله يسامحك

~✽~

لطافة النفس ماتنباع ضمن السلع
تجي من الله ولو هشّوا على شمعتي

الكلمة الموجعه صعبه علي تنبلع
اغص فيها وتنزل بس ! مع دمعتي

~✽~

ياحزن نفسي على شيٍ تبيه
دايم يدين السعادة باخله

المكان اللي يبكّي لاتجيه !
لو ضحكت بذكرياتك داخله

~✽~

وجه ذنبي من كثر ماهو ( بجيح )
اشعر انه بين توباتي … ( ينام )

ومن جلال امي كثر ماهو(مريح )!
بعد ماصلي به أشمّه … ( وانام )

~✽~

ياقلبي الممتلي من كثرة الخيبة
لا تحسب إنك على صدتك توجعهم !

قساوة الطيّب اللي متعبه طيبه
توجعه أكثر من اللي قاسيٍ معهم

~✽~

العــذر من كثر ما ودّى وجاب
جاب راس البعد لو راسة يبس !

من عزيزة نفس لاتنطر عتاب
تزفــرك وقت الزعل لوّك نِفَــس

~✽~

يا ودّي أشيخ في حضن الاماني واغيب
ويكفنوني طهر بيض السحايب : كفن

مدامني بأول العشرين شفت المشيب !
بَـ آصل ثلاثين عام من الحزن وأندفن

~✽~

أمشي وأنا إيدي بقلبي من الخوف
صوت الفِتن مايترك الذهن شارد

وجه المعاصي اصبح اليوم مألوف
والناس صارت تعصي بقلب بارد !

.
.
.

هنا حساب الشاعرة [ مرام القحطاني ] على تويتر :
(  Yafe3h@ )
.
.
 
وإلى شاعر مغرّد آخر ..
نشر الموضوع :

إترك تعليقك

كن أول من يعلّق هنا !

avatar
  Subscribe  
Notify of
إغلاق